ဂျပန်သံရုံးဝန်ထမ်းဟောင်း ဓားထိုးခံရမှုဖြင့်သေဆုံး

မေလ ၂၈ ရက်နေ့ ခဝဆာခိမြို့မှာရှိတဲ့ နိုဘိုရိတိုဘူတာအနီးနားတဝိုက်မှာ မူလတန်းကလေးငယ် ၁၉ ဦး၊ အမျိုးသမီးတစ်ဦးနဲ့ အမျိုးသားတစ်ဦးတို့ဓားထိုးခံရမှုဖြစ်ပွားခဲ့ပါတယ်။

၎င်းဖြစ်စဥ်မှာ မြန်မာနိုင်ငံဆိုင်ရာ ဂျပန်နိုင်ငံသံရုံးမှာ လုပ်ကိုင်ခဲ့ဖူးတဲ့ ဂျပန်လူမျိုးတစ်ဦးလည်း ပါဝင်ခဲ့ပါတယ်။

သူ့နာမည်ကတော့ 小山智史（おやま・さとし）အိုယမ ဆတိုရှိ ဖြစ်ပါတယ်။

https://img.huffingtonpost.com

၂၀၁၄ ခုနှစ် ဂျပန်နိုင်ငံ နိုင်ငံခြားရေးဝန်ကြီးဌာနရဲ့တရားဝင် website မှာတင်ထားတဲ့အကြောင်းအရာအရ သူဟာ မြန်မာနိုင်ငံကို နှစ်သက်သဘောကျသူတစ်ဦးဖြစ်ပြီး မြန်မာစကားကျွမ်းကျင်တဲ့ ဂျပန်လူမျိုး ၁၀ ဦးထဲမှ တစ်ဦးဖြစ်တယ်ဆိုတာကိုလည်း သိရပါတယ်။

Mr. Oyama ဟာ နိုင်ငံခြားဘာသာတက္ကသိုလ်ကို ဝင်ရောက်ခဲ့စဥ်က ဘယ်သူမှသိပ်မသိတဲ့ ဘာသာစကားကိုလေ့လာချင်တယ်ဆိုပြီး မြန်မာစာကိုရွေးချယ်ခဲ့တာဖြစ်ပါတယ်။

တက္ကသိုလ်တက်နေတဲ့အချိန်မှာ မြန်မာနိုင်ငံကို ပထဆုံးတစ်ခေါက် လာရောက်လည်ပတ်ခဲ့ပြီး မြန်မာနိုင်ငံရဲ့ဆွဲဆောင်မှုရှိတဲ့အရာတွေကို ခံစားလိုက်ရပါတယ်။

နောက်တော့ မြန်မာနိုင်ငံနဲ့အကြောင်းအရာတွေ အားလုံးကိုနှစ်သက်စိတ်ဝင်စားပြီး ယဥ်ကျေးမှုတွေကို ဖလှယ်ပေးချင်တစ်ဦးဖြစ်လာခဲ့ပါတယ်။

https://koku-byakunews.com/wp-content/uploads/2019/05/oyama.jpg

ဒါကြောင့် သူရွေးချယ်လိုက်တဲ့ ဘာသာစကားနဲ့ပတ်သက်တဲ့ အလုပ်အကိုင်ကို လုပ်ကိုင်ချင်တယ်ဆိုပြီး နိုင်ငံခြားရေးဝန်ကြီးဌာနမှာ ဝင်ရောက်လုပ်ကိုင်ခဲ့ပါတယ်။

၂၀၀၅ ခုနှစ်ကနေ ၂ နှစ်ကြာ မြန်မာစာကို ဆက်လက်လေ့လာသင်ယူခဲ့ပြီး မြန်မာနိုင်ငံဆိုင်ရာ ဂျပန်သံရုံးမှာ မြန်မာဘာသာအထူးတာဝန်ခံအပြင် စကားပြန်အနေနဲ့လည်း ၃ နှစ်ကြာ လုပ်ကိုင်ခဲ့ပါတယ်။

နောက်ပြီး နိုင်ငံတော်အတိုင်ပင်ခံပုဂ္ဂိုလ်ဖြစ်တဲ့ ဒေါ်အောင်ဆန်းစုကြည်ရဲ့ စကားပြန်အနေနဲ့ ဂျပန်ခရီးစဥ်တိုင်းမှာ လိုက်ပါခဲ့သူလည်းဖြစ်ပါတယ်။

https://www.sankei.com/images/news/190530/lif1905300013-p1.jpg

ဂျပန်နိုင်ငံကို ပြန်ရောက်သွားတဲ့အချိန်မှာတော့ နိုင်ငံခြားရေးဝန်ကြီးဌာနရဲ့အတွင်းရေးမှူးရုံး အထွေထွေဌာနခွဲမှာ အရှေ့တောင်အာရှနဲ့ပတ်သက်ပြီး လုပ်ကိုင်ဆောင်ရွက်ခဲ့ပါတယ်။

နောက်ပြီး နိုင်ငံခြားရေးဝန်ကြီးဌာနရဲ့ သံအမတ်အနေနဲ့ လုပ်ကိုင်နေတာဖြစ်ပါတယ်။

အဲ့ဒီနောက်မှာ ပြည်တွင်းပြည်ပသတင်းဌာနဆီကို သတင်းအချက်အလက်တွေ ပို့ဆောင်ပေးပြီး၊ နှစ်နိုင်ငံယဥ်ကျေးမှုဖလှယ်တဲ့စီမံကိန်းတွေနဲ့ နှစ်နိုင်ငံဆက်ဆံရေး၊ သံတမန်ရေးရာမှာလည်း ပါဝင်ခဲ့ပါတယ်။

ဂျပန်စာလေ့လာနေတဲ့သူတွေအနေနဲ့ သူ့အကြောင်းကိုပိုပြီးသိချင်ရင် အောက်က Link ထဲမှာဝင်ကြည့်လိုက်ပါနော်။

https://www.mofa.go.jp/mofaj/press/page22_000389.html

ဒီလိုမြန်မာနိုင်ငံအတွက် တန်ဖိုးရှိတဲ့ပုဂ္ဂိုလ်ဟာ သူ့ရဲ့မူလတန်းအရွယ်သမီးလေးကို ကျောင်းသွားဖို့ ဘက်စ်ကားမှတ်တိုင်ကိုလိုက်ပို့ရင်းနဲ့ သေဆုံးခဲ့ရတာဖြစ်ပါတယ်။

မေလ ၂၈ ရက်နေ့ မနက် ၇ နာရီ ၄၅ မိနစ်လောက်မှာ ဓားထိုးမှုဖြစ်ပွားခဲ့တာဖြစ်ပါတယ်။

ခဝဆာရှိမီးသတ်တပ်ဖွဲ့ရဲ့ ပြောကြားချက်အရ မနက် ၇ နာရီ ၄၁ မိနစ်လောက်မှာ ၁၉ ဦး ထိခိုက်ဒဏ်ရာ ရရှိခဲ့ပြီး ၆ ဦး ဒဏ်ရာပြင်းထန်ကာ ၃ ဦးက စိုးရိမ်ရတဲ့အခြေအနေရှိနေခဲ့တဲ့အပြင် အရမ်းမပြင်းထန်တဲ့ ဒဏ်ရာရရှိခဲ့သူ ၅ ဦးနဲ့ အပေါ့စားထိခိုက်သူ ၈ ဦးရှိခဲ့တာဖြစ်ပါတယ်။

ဒီအမှုမှာ ဓားကိုင်ရမ်းကားခဲ့တဲ့တရားခံကို ရဲတွေက ဖမ်းဆီးနိုင်ခဲ့ပေမယ့် သူ့ကိုယ်သူဓားနဲ့ထိုးပြီးသတ်သေခဲ့တာကြောင့် ဆေးရုံကိုသယ်ဆောင်သွားချိန်မှာပဲ သေဆုံးသွားတယ်လို့ အတည်ပြုချက်ထွက်ပေါ်လာခဲ့ပါတယ်။

ကျူးလွန်ခဲ့တဲ့တရားခံဟာ ခဝဆခိမြို့ အဆိုးခု တမမိ အနုပညာတက္ကသိုလ်မှာ အလုပ်လုပ်ကိုင်တဲ့ အသက် ၅၁ နှစ်အရွယ်အမျိုးသားဖြစ်ပါတယ်။

ဒီဖြစ်စဥ်ကြောင့် မူလတန်း ၆ နှစ်မြောက်အရွယ် ကျောင်းသူလေးတစ်ဦးနဲ့ အသက် ၃၉  နှစ်အရွယ် အိုယမဆတိုရှိစံ တို့သေဆုံးခဲ့ရပါတယ်။

စိတ္တဇလူရမ်းကားဟာ အိုယမဆတိုရှိစံကို တစ်ပေလောက်ရှိတဲ့ဓားနဲ့ နောက်ကနေထိုးပြီး မူလတန်းကလေးတွေကိုပါ ဓားနဲ့ လိုက်ခုတ်ခဲ့တာဖြစ်ပါတယ်။

ဒီလိုဂျပန်နိုင်ငံရော မြန်မာနိုင်ငံအတွက်ပါ အကျိုးတွေဖြစ်ထွန်းစေတဲ့ ပုဂ္ဂိုလ်တစ်ဦးသေဆုံးသွားခဲ့ရတာဟာ တကယ်ကို နှမြောစရာကောင်းပါတယ်။

Su Hlaing