တိုကျိုမှာရှိတဲ့ အိမ်တွေကို လိုချင်ပါသလား ? အလကားတောင်ရနိုင်တယ်နော် !

တိုကျိုမြို့မှာ အိမ်တစ်လုံးလောက်ပိုင်မယ်ဆိုရင် ဘယ်လောက်ကောင်းလိုက်မလဲနော် …..

အဲ့ဒီအတွေးက နိုင်ငံခြားသားတွေမှမဟုတ်ဘဲ ဂျပန်နိုင်ငံသားတွေဆီမှာတောင်ရှိတဲ့ မျှော်လင့်ချက်တစ်ခုဖြစ်ပါတယ်။

အဲ့ဒီအိမ်လေးတွေကို အလကားရနိုင်တယ်ဆိုတာကို သိပါသလား ?

တိုကျိုဆိုပေမယ့် ရှင်းဂျူ့ခုနဲ့ ရှိဘုရ မှာတော့မဟုတ်ပါဘူး ။

တိုကျိုမြို့ရဲ့  檜原村（ ひのはらむら ）ဟိနိုဟရ ဆိုတဲ့ရွာလေးမှာ ဖြစ်ပါတယ်။

https://www.excite.co.jp/news/article/Recordchina_20190119027/?utm_source=news_i&utm_campaign=fromapp&utm_medium=mail

ဘယ်နေရာလဲဆိုတာကို သိပါသလား ?

စာရေးသူလည်းပဲ တိုကျိုဇာတိဆိုပေမယ့် ဟိနိုဟရရွာ ဆိုပြီးတော့ တစ်ခါမှတောင် မကြားဖူးပါဘူး ။

တိုကျိုအနောက်ပိုင်းမှာရှိတဲ့ တောင်တန်းတွေကြားထဲကရွာ ဖြစ်ပါတယ်။

၁၉၆၀ ခုနှစ်မှာ ဟိနိုဟရရွာရဲ့ လူဦးရေက အယောက် ၇၀၀၀ လောက်ရှိခဲ့ပေမယ့် အခုတော့ အယောက် ၂၂၀၀ လောက်အထိ လျော့နည်းသွားပါပြီ။

တကယ်တော့ ဟိနိုဟရရွာမှာ ကန့်သတ်ထားတာလည်းမရှိဘဲနဲ့ အိမ်ခြေအလွတ်တွေက ၂၀၀ ကျော်လောက်ရှိနေပါတယ်။

ဂျပန်တစ်နိုင်ငံလုံးရဲ့ ၇ အိမ်မှာ ၁ အိမ်လောက်က အိမ်အလွတ်တွေဖြစ်တယ်ဆိုတာကို စာရင်းအင်းအချက်အလက်တွေအရ သိရပါတယ်။

ဟိနိုဟရရွာမှာ အိမ်တွေကို ရောင်းချနေပေမယ့် ဝယ်ယူမယ့်သူက လုံးဝကိုမရှိတာဖြစ်ပါတယ်။

ဒါကြောင့် အလကားနီးနီး ငွေပမာဏနဲ့ငှားပေးပြီး ၊ နောက်တစ်ခုက အိမ်ပြုပြင်ရေးအတွက် လိုအပ်တဲ့ငွေပမာဏရှိဖို့အတွက် အများဆုံး ယန်း ၂၂ သိန်းကို ထောက်ပံ့ကြေးအနေနဲ့ ထုတ်ပေးနေပါတယ်။

လတ်တလော ဂျပန်နိုင်ငံတစ်ဝှမ်းလုံးမှာ အိမ်အရေအတွက် ၈၂ သိန်း က အိမ်အလွတ်တွေဖြစ်နေပြီး ၊ ၂၀၃၃ ခုနှစ်ရောက်ရင် အိမ်အရေအတွက် သိန်း ၂၀ လောက် နည်းသွားဖို့ မျှော်မှန်းထားပါတယ်။

ဂျပန်နိုင်ငံမှာလက်တွေ့ကြုံတွေ့နေရတာက လူဦးရေနည်းပြီး အိမ်တွေပိုများနေတာဖြစ်ပါတယ်။

နောက်ပြီးတော့ မြို့ကြီးတွေမှာပဲ သွားရောက်နေထိုင်ကြတာကြောင့် မြို့မှာပဲစုပြုံနေပြီး ဒီဒေသလေးတွေမှာတော့ တော်တော်လေးခြောက်ကပ်ကပ်ဖြစ်နေရတာ ဖြစ်ပါတယ်။

တကယ်တော့ ဟိနိုဟရရွာက တိုကျိုမြို့မှာရှိတာဖြစ်ပါတယ်။

အဲ့ဒီမှာ သွားရောက်နေထိုင်မယ်ဆိုရင် တိုကျိုမြို့သားတွေ ဖြစ်လာလိမ့်မယ်နော် ！